Bana sa OFW nga giingong naghunos sa kinabuhi sa Kuwait, malaumon nga mauli ang patay’ng lawas sa asawa dinhi sa Pinas

Davao City – Emosyunal nga gisaysay ni EJ Mahinay ang gidangatan sa iyang asawa nga si Mercy Mahinay human kini giingong naghunos sa kinabuhi didto sa Kuwait asa kini nagtrabaho isip Overseas Filipino Worker (OFW).

Gibisita sa DXDC Public Service Team ang bana sa OFW sa ilang balay sa Barangay Alejal, Carmen, Davao del Norte, ug didto iyang gibutyag nga ayha pa nahitabo ang insidente, gisulti sa iyang asawa nga ginadagmalan na kini sa iyang amo.

“Ang iyang istorya sa akoa, dili na daw niya makaya ang trabaho kay sige ra sya’g pasakitan sa mga bata, anak sa iyang amo. Laparohon siya, birahon ang buhok, bunala’g baso. Labanan ang mga bata sa ilang inahan kay spoiled sila,” sulti sa bana.

Sa pagkakaron, ginapaabot na lang sa pamilya sa OFW ang imbestigasyon sa kapulisan sa Kuwait pagsuta kung aduna bay foul play ang insidente. Samtang nakig-alayon na usab karon ang pamilya ngadto sa agency ug sa Overseas Workers Welfare Administration (OWWA) aron mapauli ang lawas sa biktima.

Nasayrang magnapulo ka bulan pa lang karong Oktubre 2023 ang iyang asawa ug unang higayon kining nanrabaho gawas sa nasud.

Gipasalig usab sa bana nga iyahang atimanon ang ilang 3 anyos nga babae nga ilang nag-inusarang anak.

RadyoMaN Kirby Manzon