Sa interview sa DXDC RMN Davao kang PSSg Virgilio Buhat Jr., ang imbestigador sa Tagum City Police Station, giila ang biktima nga mao si Ramel Abellana Lintuan, 54 anyos, negosyante ug residente sa Villa Paraiso, Visayan Village, Tagum City, Davao del Norte.
Sa imbestigasyon sa kapulisan, bangi sa negosyo ang ginalantaw karon nga motibo sa krimen ug giingong dugay na nga adunay hulga sa kinabuhi sa biktima.
Butyag sa pulis nga gikan sa maong hardware si Lintuan ug pasakay na unta kini sa iyang puti nga sakyanan sa dihang kalit lang matud pa kining gipusil sa gituohang riding in tandem nga wala pa mailhan.
“Pagpusil ulo man, patay gyud siya deritso. Permirong buto, luyo sa ulo unya pagkatumba niya gitiwasan siya sa nawong, nilapos gihapon sa ulo,” segun ni Buhat.
Samtang sa post pa sa anak niining si Vincent Lintuan ingon man sa katawhan nga nakaila sa biktima, giila kini nga usa ka maayo ug matinabangon nga tao maong karon hustisya ang ilang buot maangkon.
RadyoMaN Ivy Parido
