Apilon sa kapolisan sa lalawigan sa Sugbu pagsusi ang posibilidad nga adunay kalabutan ang panagakaribal sa negosyo sa ilegal nga drugas ug sugal sa pagpatay ni kanhi Talisay Councilor Emelio Go.
Ang hepe sa Cebu Provincial Police Office nga si Sr. Supt Edgar Alan Okubo nibutyag nga daghang anggulo ang ilang gitan-aw karon , ug iyang giangkon nga apil na niini ang panagribal sa negosyo sa drugas ug ilegal nga sugal .
Gibutyag usab ni Okubo nga si Go anaa sa drug ug illegal gambling watchlist sa PNP .
Gawas niini gisusi usab sa kapolisan kung aduna bay koneksiyon ang pagpatay kang Go sa nahitabo nga suway nga pagpatay ni Jail Inspector Edwin Sarcon ang kanhi deputy warden sa Talisay City Jail.
Ang giingong drug lord sa Talisay nga si Steve Go nga unang nabilanggo sa Talisay City Jail , pag-umangkon sa kanhi konsehal .
Nahimong init ang Talisay City Jail dihang didto pa gitanggong si Steve Go nga pag-umangkon ni kanhi Konsehal Go .
