Pilar, Capiz – Positibo nga ginkilala sang iya pamilya ang bangkay nga nasapwan mga 2:40 kahapon sang hapon sa higad sang baybayon sang Barangay Dayhagan, Pilar, Capiz. Yara na sa ‘state of decomposition’ ang bangkay ni Jhoncell Condello, 33-anyos, single, sang Isla Gigantes, Carles, Iloilo sang nasapwan sang isa ka residente sang Barangay Dayhagan.
Madasig naman nga nagrespondi ang mga katapo sang Pilar PNP, matapos ang pagpanawag ni Punong Barangay Melanie Bartolome
Base sa imbestigasyon sang Pilar PNP, sakay sa baroto nga wala sang katig ang biktima upod sa duha sini ka mga kaupdanan nga ginkilala kanday Ricky Bulojabo, 18-anyos kag Rowell Mahusay 22-anyos, lunsay residente sang Isla Gigantes, Carles, Iloilo.
Padulong sa nasambit nga isla ang ginsakyan nga baroto nga may karga nga ice, apang bangud sang ginhampak sang mabaskog nga balod ang baroto rasun nga naubon ini. Nakalangoy sanday Bulojabo kag Mahusay antes nasagop sang isa ka sakayan, apang dimalas gid nga wala nakasalbar si Condello.
Nagluntad ang insidente sang nagligad nga Disyembre 17, 2017 sa kasagsagan sang Bagyong Urduja nga nagpanalasa sa Capiz kag Northern Iloilo.
*(Photo Credit: Melanie Joy Herrera Fausto Bartolome)*
