*San Pablo, Isabela-* Isang bangkay ng hindi pa nakikilalang lalaki ang natagpuang nakahandusay sa daan partikular sa Sitio Calingling, Brgy Ballacayu, San Pablo, Isabela.
Sa panayam ng RMN Cauayan kay Police Captain Reden Crisologo, hepe ng PNP San Pablo, bandang alas singko kaninang umaga nang makatanggap ng tawag ang kanilang himpilan hinggil sa natagpuang bangkay ng isang lalaki.
Sa pagresponde ng mga otoridad ay naabutan ang duguang bangkay ng biktima na nakahandusay sa gilid ng daan na may suot na puting T-shirt, short na pula at naka tsinelas.
Ayon sa hepe, posibleng hindi residente sa naturang bayan ang natagpuang bangkay dahil mismong mga brgy Officials at mga residente ay hindi matukoy ang pagkakakilanlan ng biktima.
Posible rin anya na ang tinamong basag sa ulo ang sanhi ng pagkamatay ng biktima.
Nasa isang punirarya na ang bangkay ng biktima upang isailalim sa pagsusuri habang patuloy pa ang isinasagawang imbestigasyon ng mga otoridad hinggil sa natagpuang bangkay.