Roxas City, Capiz – Matapos ang pila ka adlaw nga pagpangita sang iya pamilya, nasapwan na kahapon nga adlaw ang 67-anyos nga amay kun sa diin ini ang nadiskubrehan nga ginpatay kag ginhulog sa septic tank sang kaugalingon sini nga anak sa Brgy Dinginan.
Ginkilala ang biktima kay Rizaldo Azuro nga nag-angkon pilas sa iya tangkugo samtang ang suspetsado amo mismo ang anak sini nga si Roger Azuro nga kun kaisa gina-abot sang depirensya sa paminsaron.
Suno sa inisyal nga imbestigasyon sang kapulisan, gin-ako sang suspek ang ginhimo sini nga krimen nga pagpatay sa kaugalingon nga amay.
Iya nga ginhulog ang bangkay sa septic tank nga nahamtang sa nalikod nga porsyon sang ila balay.
Antes sini, ginpablotter pa sang pamilya ang pagka-missing sang biktima apang bangud sa konsensya, ginpakamaayo nga istudlo sang suspek kun sa diin sini ginbutang ang bangkay sang amay.
Yara na subong sa kustodiya sang kapulisan ang suspek.
Ginpahayag naman sang imbestigador sang Roxas City PNP(RCPNP) nga si Police Master Sargeant Jazal Andrada nga ginpaidalom sa autopsy ang bangkay sang biktima.
Nahibaluan nga masami nga ginasakit sang biktima ang suspek nga anak nga ginapatihan nangin kabangdanan sang pagbalos sang suspek.
