Bangkay sang Capizeña nga OFW nga napatay sa Kuwait, nakapauli na sa Capiz

Roxas City, Capiz – Nag-abot na sa Capiz mga alas 9:00 kaina sang aga ang bangkay sang CapizeƱa Overseas Filipino Worker (OFW) nga napatay sa pungsod Kuwait.
Emosyonal nga ginsug-alaw sang iya pamilya ang bangkay ni Jenelyn Maxian kaina sa Roxas City Airport.
Ginpahayag ni Mr. Rogelio Maxian sang Barangay Agdahon, Cuartero, bana sang napatay nga si Jenelyn Maxian, nga tubtub subong masakit gihapon kag indi pa gid nila mabaton ang pagtaliwan sang iya asawa. Suno pa diri nga indi pa maathag sa ila kon anu ang rasun sang kamatayon ni Jenelyn.
Ginpasalamatan man ni Mr. Maxian Department of Foreign Affairs (DFA) kag Overseas Workers Welfare Administration (OWWA) natigayon nga mapauli ang bangkay sang iya asawa diri sa Capiz.
Sa madumduman nga ginpahayag ni Mr. Rogelio Maxian nga nagalab-ot na sa lima ka tuig nga wala makapauli sa iya pamilya ang OFW nga si Jenylyn Pimentel Maxian, 38-anyos sang Brgy. Agdahon, Cuartero, Capiz nga gin-alegar ginbawian sang kabuhi sa pungsod Kuwait.
Suno kay Mr. Maxian, nga tuig 2013 pa sang nagbiya ang iya asawa agud nga magtrabaho bilang domestic helper sa amo nga pungsod apang makaligad ang duha ka tuig, nakabaton sila sang impormasyon nga naglayas ini sa iya employer bangud wala ginaswelduhan sang husto kag ginamaltrato. Bangud sini wala natapos ni Jenelyn ang iya kontrata sa employer kag sa agency. Ginpahayag dugang Mr. Maxian, posible nga nagpanago sa mga otoridad sa Kuwait si Jenelyn kag masami nga nagatinir kag nagasaylo-saylo na lamang sa mga abyan sini nga OFW. Ginpahayag dugang sang bana nga ang katapusan nga komunikasyon ni Jenelyn sa ila nga bata sa Metro Manila sadtong una pa nga semana sang Oktubre. Wala man nakasugid si Jenelyn sang iya matuod nga kahimtangan sa pungsod Kuwait kag nakibot na gid lamang sila sang balita nga napatay na ini sang nakaligad nga Oktubre 20. Samtang plano naman sang pamilya nga ihaya anay sang isa ka semana sa Brgy. Agdahon, Cuartero, Capiz ang bangkay ni Jenelyn agud makaupod man sang iya himata, antes idul-ong sa iya katapusan nga palahuwayan.

Facebook Comments