Ajuy, Iloilo- Natalana nga ipa-idalom sa autopsy ang bangkay ni Niel Hervas, 24 anyos kag criminology graduate sang NIPSC-Ajuy nga nasapwan nga nagalutaw sa dam sa Malayuan, Ajuy kaina sang aga, Agosto 16.
Suno kay Punong Barangay Noel Sentino Ditosil sang Malayuan, Ajuy, nagpadulong pa sa Creekside Resto Bar si Hervas upod ang iya mga abyan kag classmate sang Agosto 14 agud mag inum-inom.
Santo sa pagpangusisa ni Ditosil, may nervous breakdown si Hervas kag sang nagluntad ang pagbina-isay sa ilimnan, nagwa si Hervas kag wala na makabalik.
Ginpangita sang pamilya ang biktima tubtob nasapwan na lang ini kaina sang aga nga nagalutaw sa dam kag may pilas sa ulo.
Suno kay Ditosil, posible naglumpat sa kudal sang Creekside ang biktima kag nahulog sa tubig .
Pagpati ni Ditosil, nagtaklas pa sa pihak nga pangpang ang biktima kag nagtupa sa dam sa diin 8 ka tapak ang kadalumon sang tubig.
Ginapatihan nga na-igo sa bato ang ulo ni Hervas rason nga nakaangkon ini sang pilas sa agtang .
Nagalaum ang pamilya nga pinaagi sa autopsy result , ila matul-id kon aksidente ukon hungod nga ginpatay ang biktima.
(c) Laika Francisco Lim
