Nasapwan nga wala na sang kabuhi kag hublas ang isa ka mangunguma sa Purok Magsaysay, Brgy. Rang-ay, Banga, South Cotabato, kahapon nga adlaw, Marso 1, 2021.
Ginkilala ang biktima kay Jessie Antonio Ablanida, 38 -anyos, single kag residente sang Purok Roxas, Brgy. Rang-ay, Banga, South Cotabato base naman sa kumpirmasyon sang iya nga tatay.
Ginpahayag ni Dominador Boquiren Rabac, BPAT member sang nasambit nga barangay nga nakit-an niya ang biktima sa higad sang dalan nga hublas alas 07:50 sang aga sa amo nga adlaw sang nag-agi ini sa lugar padulong sa iya nga uma.
Samtang suno naman sa SOCO team, ang biktima ang nakaangkon sang facial deformation nga indikasyon nga ginlampusan ini sang matig-a nga butang. Nakaangkon man ini sang tatlo ka pilas sang pagpanglabo sa iya wala nga guya kag lima ka buno sa dughan nga nagresulta sang iya kamatayon.
Sa subong padayon ang imbestigasyon sang Banga MPS sa posible pagkilala sa suspek kag motibo sa insidente.
