Nasapwan na kahapon sang hapon ang bangkay sang mangingisda nga una ginreport nga nadula sang nakaligad nga domingo sa kalalawran sang Carles, Iloilo.
Nakit-ang ang bangkay sang biktima nga si Juncel Cudilla, 33 anyos sang Isla Gigantes Sur sa baybayon sang Barangay Dayhagan, Pilar, Capiz .
Ginpahayag ni Philippine Coast Guard Commander Ramil Palabrica nga positibo nga ginkilala sang iya mga himata ang nasambit nga biktima.
Madumduman nga sang Domingo sang hapon nagsakay sa bangka ang biktima upod sa duha pa nga sanday Ricky Bolohabo kag Ruel Mahusay gikan sa isla Gigantes pakadto sa Bancal, Carles agud magbakal sang ice apang nagkulob ang ila bangka sang nagapapuli na sila matapos ginhampang sang pugada.
Gin-anod sa baybayon sang Naburot island sanday Bolohabo kag mahusay kag nakaluwas samtang nadula naman si Cudilla kag kahapon lamang nasapwan ang iya bangkay.
