Report ni: Jennifer Palomo Debaja
Nakaabot na sa Laguna ang bangkay sang mag asawa nga Leomer kag Erika Joyce Lagradilla matapos nalumos sa Dhiffushi island samtang naga honeymoon sa Maldives.
Una nga ginlupad sa Sri Lanka ang mag asawa para sa ginpatigayon nga embalsamasyon. Takna alas 3:26 naman sang Sabado sang hapon nag abot sa Ninoy Aquino International Terminal 1 ang ila bangkay sakay sa Etihad Airways flight EY-424 kag ginbiyahe sa Laguna sina man nga gab-i.
Temporaryo nga igahaya ang bangkay ni Erika sa ila poluy-an sa Sta. Cruz, Laguna apang pagadal on man ini sa luyo sang iya mister sa Lumban, Laguna sa Miyerkules. Nakaskedyul ang ila lubong sa Enero 26, 2019.
Pila ka adlaw matapos natabo ang trahedya, nagpanawagan sang bulig pinansiyal ang pamilya Lagradilla sa publiko para sa repatriation sang ila bangkay. Nagpasalig ang DFA nga sila na ang maga shoulder sang P1.2 million pero gin salu ini sang Maldives Ministry of Tourism.
Pareho nga OFW nurses ang mag asawa kon sa diin nakabase sa Singapore si Leomer 30 anyos, samtang sa Saudi naman nakabase si Erika, 29 anyos.
Ginkasal ang mag asawa sang Disyembre 18, 2018 matapos ang 10 katuig nga pag nobyahanay. Nagpadulong naman sa Maldives ang mag asawa para sa ila honeymoon sang Enero 11, 2019.
Sa report nga ginpalab-ot sa DFA sang Philippine Embassy sa Dhaka, una nga nalumos si Leomer kag naka pangayo pa sang bulig si Erika apang sang magresponde ang mga staff sang resort, pareho na nga nalumos ang mag asawa kag gin deklarar dead on arrival sa ospital.
