Takna alas 3:20 kaina sang hapon ginpatigayon ang public viewing sa bangkay ni Christelyn Perfas, 32 anyos sang Anini y Antique antis ang iya panakayon pauli sa Pilipinas.
Nagdugok sa mortuary sang North District Hospital Sheungshui ang mga himata kag kaabyanan ni Christy diri sa Hong Kong para maghatag sang ila katapusan nga pagdumdom sa iya. Nag tambong man si Ms. Lorna Obedoza sang OWWA Hong Kong.
Pagkatapos sang misa nga gin officiate ni Father Francis Mabunay gindala na ang bangkay ni Christy sa HK International Airport para sa repatriation .
Gina alegar naghikog ang biktima sang Agosto 1 sa gina obrahan nga balay sa Sheungshui paagi sa pagbitay sang iya kaugalingon gamit ang cable wire. Dugang nga ginpasuni nag inom sang pesticide ang biktima nga wala ginapatihan sang iya pamilya.
Apisar ipauli na ang bangkay sang biktima, hugot sa gihapon ang pagpati sang pamilya ilabi na ang iya mister nga si Ariel kag kaabyanan sini nga may foul play sa iya kamatayon.
Sa panaysayon ni Ariel, indi mapatihan nga naghikog ang misis sini tungod wala man ini sang ginsugid nga problema . Dugang pa sang mister, nagbakasyon pa sang Hunyo 25 ang misis sa Antique kag ila pa ginselebrar ang ika 9 ka tuig nga wedding anniversary sang Hunyo 26.
Base sa pahayag sang malapit gid nga abyan sang biktima nga nag asikaso sa iya halin pagka ospital sini , nadula ang cellphone nga una na ginpahayag sang amo nga wala na sang kaundan. Ukon nareformat na ini. Missing man ang maleta nga ginasudlan sang pila ka importante nga dokumento sang biktima. Wala naman sang cctv sa poluy an sang amo sang ginsekyar liwat sang kapulisan sa request sang mister sang biktima tungod man naka panugid ang misis nga may pila ka cctv sa poluy an .
Padayun pa ang imbistigasyon sang HK police sa kaso.
