Nawad-an na og pasensiya ang mga taga – Marawi City sa kadugay nga pagsugod sa rehabilitasyon sa ground zero o most affected area, siyam ka bulan human ang giyera batok sa teroristang grupo.
Kini ang reaksiyon ni Zia Alonto -Adiong, isip usa ka residente sa MAA, human gi- anunsiyo atol sa usa ka press conference sa Malakanyang, nga ma- oktaba na usab ang ground breaking sa rehabilitasyon karong bulan unta sa Hulyo.
Una nang gitakda unta niadtong Hunyo 15 ang pagsugod og trabaho sa kanhi battle ground aron tukuron pag usab ang mga balay ug mga building nga iya sa gobyerno.
Miingon si Adiong, kinsa assemblyman usab sa ARMM, nga kung nawad-an na siya og pasensiya nga aduna pa siyay kumportableng pinuy-anan, walay rason nga mobati og susama niini ang iyang mga kabanay o paryente nga anaa lang nagpuyo sa mga evacuation tents ug mga temporary shelters.
Tungod niini, gihangyo ni Adiong ang gobyerno, pinaagi sa Task Force Bangon Marawi, nga ipadayun ang konsultasyon ug dayalogo ngadto sa mga apektadong pamilya aron ipasabot ang tinood nga sitwasyon.
Una na’ng gi-anunsiyo sa TFBM nga na-postpone ang ground breaking humam ma- disqualify ang Bangon Marawi Consortium tungod sa financial ug legal nga mga rekisitos.
Kamulo karon ang technical working group sa TFBM sa ilang pagsusi sa kwalipikasyon sa Power China nga maoy naa sa ikaduha sa listahan sa mga developer nga nag propose nga motrabaho sa rehabilitasyon sa Marawi. (RadyoMan Divina M. Suson )
