Matapos ginsertipikahan nga urgent ni Presidente Rodrigo Duterte, gin-aprubahan na sa 3rd and final reading ang House bill 6475 ukon ang Bangsamoro Basic Law ukon BBL.
Nakalusot sa Kamara ang BBL sa diin, 226 ang nagpabor, 11 ang wala nagpabor kag 2 ang nag-abstain.
Sa idalom sang BBL , mangin Autonomous Region of Bangsamoro ukon ARB ang anay Autonomous Region in Muslim Mindanao .
Antes ginbotohan ang BBL, gin-islan ini sang substitute bill kon sa diin, ang tanan nga probisyon nga ginkasugtan diri ang halin sa nagligad nga all member caucus.
Sa idalom sang BBL, isa ka beses na lamang ang plebesito nga pagahiwaton sa sulod sang 90 ka adlaw tubtob 120 ka adlaw matapos pirmahan sang president ang layi.
May kaugalingon nga Bangsamoro Military Command kag Bangsamoro Police apang sa idalom gihapon ini sang AFP kag PNP.
Indi MILF ang magabu-gos diri apang bukas nga mag-apply ang MILF members agud mangin suldado kag pulis.
Magapabilin ang sistema sang Shariah court sa ARB kag may kaugalingon nga Appelate Court apang mahimo i-apila ang desisyon sang mga ini sa Korte Suprema .
Yara gihapon sa national government ang kontrol sa defense and external security, foreign policy, monetary policy, citizenship, naturalization, immigration kag customs and tariff.
(photo from web)
