Davao City – Dakong hagit karon ngadto sa Duterte administration ang hisgotanan kalabot sa usaka ‘unified nation’ ilabi na kun unsaon kini sa pag-establisar nga dili mosupak sa 1987 Philippine Constitution.
Matud ni Presidential Spokesperson Harry Roque sa interbyu kaniya sa tulumanong ‘Straight to the Point,’ angay gayud nga seryosohon ang pagtuki sa proposed Bangsamoro Basic Law (BBL) isip usa ka posibleng opsyon alang sa pagkab-ot sa malahutayong kalinaw ug progreso sa Mindanao ug sa kinatibuk-ang nasud.
Matud sa kanhi KABAYAN partylist congressman ug karon tigpamaba sa palasyo, karong adlawa gikatakdang mamulong si Pres. Rodrigo Duterte atol sa Day 2 sa 1st Bangsamoro Assembly didto sa Sultan Kudarat .
Gilauman usab nga madunggan sa entero Bangsamoro region kun unsa ang postura ug barug sa gobyernong nasyunal sa revised BBL nga hugot gipaluyuhan sa mga lideres ug ‘freedom-fighters’ ubos sa landong sa Moro Islamic Liberation Front (MILF) kinsa nakig-negosyar sa Duterte regime.
Dugang sa director sa Center Law Philippines nga kung wala ang BBL, halayo ang tsansang masinatian sa habagatang parte sa nasud ang gipangandoy nilang tumang kalinaw ug ma-eksperyensyahan ang progreso ug kalamboan.
RadyoMaN Jason Amisola
