Maayon, Capiz- Yara na sa indi maayo nga estado sang masapwan sang iya pamilya ang bangkay sang isa ka mister alas sais sang aga sa Brgy. Canapi-an banwa sang Maayon.
Ginapatihan nga nagpanginmatay pinaagi sa pagbitay ang biktima nga ginkilala kay Hernane Bermudo y Arostique, 58-anyos sang nasambitan nga lugar.
Ini matapos nga nadiskubrehan sang tiya nga si Percelita Arostique ang mabaho na nga bangkay sang biktima. Gamit sini sa pag-utas sang kaugalingon nga kabuhi ang lubid sang karabaw nga nagahaba sang 74-pulgadas.
Antes ang insidente, ginsiling ni Barangay Kagawad Virgilio Dezcalzota nga base sa pahayag sang biktima dako sini nga problema ang parte sa iya anak nga nagatudlo sa Sara National High School. Ini ang naospital bangud sa ginabatyag nga wala pa matumod nga balatian.
Samtang base sa dugang nga pagpangusisa sang mga kapulisan, may yara man sang dako nga tumor sa ulo ang biktima.
Nahibaloan nga ini ang isahanon na lamang nga nagapuyo bangud nga madugay nga nga ginbayaan sang iya mga kabataan kag asawa.
