Tapaz, Capiz – Ginbawian sang kabuhi ang 62 anyos nga tiyo matapos ginlabu sang iya kaugalingon nga gumangkon sa Barangay San Nicholas, Tapaz, Capiz.
Nag-angkon sang patal nga mga kapilasan sa likod nga porsyon sang ulo, tiyan, likod kag natuo nga kamot ang biktima nga ginkilala kay Esmundo Gapi, residente sang nasambit man nga lugar.
Ginkilala ang suspek nga si Joey Melicado, 35 anyos, kaugalingon nga gumangkon sang biktima.
Base sa inisyal nga imbestigasyon sang Tapaz PNP, nagbaisay ang biktima kag ang suspek bangud ginpahulam sang biktima ang charger kag battery sang salakyan sang suspek nga wala ini nakahibalo.
Bangud sa mainit nga pagbaisay, nagtuyo nga magkuha sang binangon ang biktima apang gin-unahan na ini sang paglabu sang suspek.
Gindala pa ang biktima sa ospital apang wala na ini nakaluwas sa kamatayon.
Boluntaryo naman nga nagsungka sa mga pulis ang nasambit nga suspek.
