Maayon, Capiz- Isa ka empleyado sang Capiz Electric Cooperative(CAPELCO) ang naluthangan alas 10 sang aga sa Sitio Hawili, Brgy. Quinat-uyan, Maayon, Capiz.
Ang ginatudlo nga suspek amu mismo ang barangay kagawad sang amu nga barangay nga ginkilala kay Ronito Degala y Delfin, 52-anyos ang pang-edaron.
Pilas sa tuo nga tiil ang naangkon sang biktima nga si Adonis Brillantes y Daradar, 47-anyos sang Brgy. Baybay, Roxas City kag team leader sang Investigation and Apprehension Section sang CAPELCO.
Nagaguha sa imbestigasyon sang mga kapulisan sang Maayon nga nadiskubrehan sang team ni Brillantes nga may yara sang illegal jumper connection sa secondary wire sang poste sang CAPELCO kag nagakonektar sa poluy-an sang suspek nga barangay kagawad.
Diri ginkomprontar ang suspek kag ginsilingan nga magpadulong na lamang sa opisina sang Capelco sa Brgy. Timpas Panit-an. Posible nga ginkaakig ini sang suspek nga ginsundan sang pagkuha sa mahaba nga klase sang armasluthang kag ginluthang ang biktima mga 15-metros ang distansya nga ginkaigo sa iya tiil.
Madasig nga gindangat sa isa ka pribado nga ospital diri sa syudad sang Roxas ang biktima agud nga mabulong samtang nadakpan naman sang mga nagresponder nga mga kapulisan ang suspek nga sa subong ang nahunong sa lock-up cell sang Maayon Municipal Police Station.
© Google Map
