Roxas City, Capiz – Ginbawian sang kabuhi samtang ginabulong sa Capiz Doctors Hospital ang isa mister nga ginluthang upod ang iya asawa samtang nagabantay sang salakyan sa Crossing Lanot, Roxas City kagab-i.
Ginkilala ang biktima sa kay Jurlvyn Clavaton, 38-anyos, residente sang Calipayan, Punta Tabuc, Roxas City apang nagapauli sa banwa sang Panitan. Nag-angkon sang patal nga igo sa dughan ang biktima nga gintunaan sang iya kamatayon.
Base sa imbestigasyon sang kapulisan, upod sang biktima ang asawa sini nga si Erna Clavaton nga nagatindog sa waiting shed samtang nagabantay sang masakyan padulong sa banwa sang Panitan. Hinali nga ginpalapitan sang suspek ang biktima kag ginluthang gamit ang ginapahayag 12-gauge shotgun.
Sa interview sang DYVR RMN Roxas kay Police Supt. Dante Tayco, hepe sang Roxas City PNP, ang pagpangimon sang suspek ang ginasunod nila nga motibo sang krimen kun sa diin ginapahayag nga may yara sang relasyon ang suspek kag ang asawa sang biktima.
Sa ginpatigayon nga follow-up operation sang mga katapo sang Roxas City PNP, natigayon nga matumbok sang kapulisan ang nahamtangan sang 33-anyos nga suspek ngg ginkilala kay Erwin Belo y Jacar. Gin-aresto sang mga kapulisan si Belo sa Sitio Lip-ak Brgy. Agbabadiang, Panit-an, Capiz kaina sang aga. Nahibaluan nga isa ka bus driver ang suspek kag residente sang Barangay Binangig, Panay, Capiz
