Mambusao, Capiz – Patay ang isa ka 52-anyos nga mister matapos nga gina-alegar nag-suicide sa Brgy Burias banwa sang Mambusao. Nasapwan sang isa sa mga estudyante sang CAPSU samtang nagapanglakaton ini sa kilid sang balay nga ginadayunan sang biktima.
Nakibot ini sang magtampad sa iya nga nagabitay na ang lawas sang biktima alas 10:00 ang takna kagab-i. Gamit sang biktima sa pagpanginmatay ang pisi nga ginhigut sa balayan. Ginkilala ang biktima sa kay Robin Lapojapo sang nasambit nga lugar.
Suno sa Mambusao PNP, temporaryo lamang nga nagapuyo ang amo nga biktima sa poluy-an sang iya utod sa sulod sang Compound sang CAPSU Burias. Samtang isa sa mga ginatudlo nga kabangdanan sang pag-suicide sini amo ang depresyon matapos nga ginbulagan sang iya asawa.
Narekober naman sang mga kapulisan ang titulo sang duta, pisi kag bangko nga gingamit sini sa pag-utas sang kaugalingon nga kabuhi. Nahibaluan nga nagtuyo man ini sa pagpanginmatay sang nagligad nga bulan sang Oktubre, 2017.
*(Photo from Mambusao PNP)*
