Davao del Sur – Blangko pa ang Bansalan Municipal Police Station sa motibo sa pagpusil-patay sa usa ka tricycle driver nahitabo sa Km. 81, Brgy. Sto. Niño, Bansalan Davao del Sur pasado alas-11 sa buntag kagahapong adlawa (September 8, 2020).
Sa interbyu sa DXDC RMN Davao sa Desk Officer sa Bansalan PNP, giila niini ang biktima nga si Mark Angelo Villamor, 33 anyos, single, self-employed ug residente sa Brgy. Rodero, Makilala, North Cotabato.
Saysay sa pulis nga padulong mag-deliver ang biktima og prutas gikan sa Old Bulatukan, North Cotabato padulong sa Bansalan kauban ang usa ka Trinidad Abansado Somo sa dihang kalit na lamang nadungog sa kauban niini ang buto sa pusil gikan sa likod nga bahin.
Dinhi na natagak ang driver rason nga mi-abot sa kanal ang sakyanan gumikan kay wala nay nagmaneho niini.
“While ga-biyahe sila, nakadungog siya’g buto (sa pusil) taud-taud nahulog nalang pud ang iyahang driver sa motor. Tungod kay wala nay driver, nahulog na man, nag zigzag ang sakyanan, nahulog sa kanal,” saysay sa desk officer.
Padayon karong gipalawman ang inbestigasyon ug pagsuta sa mga responsable sa krimen.
RadyoMaN Kirby Manzon
