CAPIZ – Sa katuyuan nga mapangapinan ang mga magagmay nga mangingisda batuk sa mga dalagko kag iligal nga pagpangisda sa kadagatan, magatukod sang Provincial Bantay Dagat Task Force ang provincial government sa pagpanguna ni Capiz Governor Antonio Del Rosario.
Ginpahayag sang gobernador nga mangin composite team ini nga pagakatapuan sang Office of the Provincial Agriculturist, Philippine Coast Guard upod sa mga munisipyo sa bug-os nga probinsya.
Suno pa kay Del Rosario, ang nasambit nga tikang ang madugay na nga ginahamdom sang iya administrasyon agud maprotehiran ang dunang manggad kag madakop ang mga persona nga iligal nga nagapangisda.
Angut sini, magabakal sang isa ka speedboat ang probinsya nga nagabalor sang kapin P3 million nga sarang magamit sang Bantay Dagat. Magluwas diri magabakal man sang iban pa nga kagamitan ang probinsya agud mapasangkad pa gid ang operasyon sang Provincial Bantay Dagat Task Force.
