Ivisan, Capiz – Nakarekord sang pinakauna nga kaso sang COVID 19 positive ang banwa sang Ivisan.
Ang pasyente ang nagapang-edaron sang 27-anyos, babaye, empleyada sang isa ka national government agency kag residente sang Brgy Balaring. Ang amo nga persona ang isa ka Authorized Person Outside of Residence ukon APOR.
Sang Hulyo 9, nag-abot ini halin sa Lapu-lapu City Cebu sakay sa barko pa-Iloilo kag nagbyahe padulong sa Ivisan.
Suno kay Mayor Ipe Yap, ginpaidalom ini sa 14-day isolation sa barangay quarantine facility.
Suno pa sa alkalde, padayon nga asymptomatic ang pasyente nga gindala na sa Roxas Memorial Provincial Hospital agud nga makuhaan sang swab sample antes nga ginbalik sa municipal temporary quarantine facility.
Sa subong padayon ang ginapatigayon nga contact tracing samtang temporaryo man nga gin-lockdown ang municipal hall sang Ivisan agud nga mapatigayon ang pag-disinfect. Anhibaluan nga nagatrabaho sa munisipyo ang utod sang amo nga COVID-19 positive.
