Roxas City, Capiz- May yara na sang anum tanan ka positive cases sang COVID 19 ang banwa sang Jamindan.
Sa nasambitan nga numero, lima sa mga ini ang nalista sa sulod lamang sang isa ka semana ukon halin Hulyo 13 tubtob Hulyo 19, 2020 base sa report sang Capiz Provincial Health Office.
Ang pinakaulihi diri amo ang 46- anyos nga Locally Stranded Individual(LSI) nga taga banwa sang Jamindan. Ang amo nga pasyente ang may yara sang travel history halin sa Quezon City, Metro Manila.
Ini ang nag-abot sa probinsya sang Capiz sang nakaligad nga Hunyo 27, 2020 kaupod ang pamilya nga lunsay mga residente sang Barangay Lucero, Jamindan, Capiz.
Gilayon ang mga ini nga ginkuhaan sang Rapid Test kun sa diin nag- negatibo naman ang resulta antes nga nag-obserbar ang amo nga pamilya sa mandatory home quarantine.
Ginpaidalom man ang amo nga LSI sa RT- PCR Test apang ginkakibot nga nagpositibo ini sa COVID-19 virus matapos ang kapin sa 21 ka adlaw nga paghulat.
Mahibaloan nga asymptomatic ang amo nga persona samtang sa subong ginkuha na sang MDRRM sang banwa sang Jamindan ang nasambitan nga magpamilya agud nga ma-isolate samtang nagapadayon sa gihapon ang contact tracing sa mga naka-upod sang mga ini samtang ginahulat ang resulta sang RT-PCR test.
