Davao City – Sa panahon karon, ang mga doktor ug mga nurses maoy gilauman ug gisaligan nga makaatiman sa mga tawong masuspetsahan ug magpositibo sa coronavirus disease kun COVID-19.
Apan sila usab ang napihigan sa mga gamit nga gikinahanglan aron maprotektahan ang ilang mga kaugalaingon aron dili sila matakdan gikan sa mga pasyente nga natakdan kun nataptan sa ning nasangpit nga balatian.
Gani, nahasubo si City Tourism Operations Office (CTOO) staff William Banzali sanglit daw nabutang sa alanganin ang panglawas sa mga doktor ug mga nurses gumikan sa kawad-on sa proteksiyon sa ilang mga kauglaingon gikan sa COVID-19.
Matud ni Banzali, angay motomar og aksyon ang gobyerno aron katabangan ang mga frontliners nga makalikay sa COVID-19 pinaagi sa pag-provide og mga personal protective gear nga ilang labaw’ng gikinahanglan.
Dugang ni Banzali nga kung ang mga pulis ug military napangitaan og pamaagi ni Pres. Rodrigo Duterte nga mag-doblado ang sweldo, labaw na ang mga frontliners sa mga ospital karon sa nasud.
Dili lamang financial ang gikinahanglan nga ayuda sa mga frontliners apan bisan na ang moral support ug pag-atiman kanila aron sila madasig sa pakigkumbate sa maong balatian.
Nabalaka si Banzali nga basin mohagsa ang turismo ug ekonomiya sa syudad kon molungtad pa og taas nga panahon ang maong balatian.
Gawas sa mga frontliners, angay usab i-empower kun pakusgon ang mga barangay aron ma-counter ang lockdown ug mapasabot ang ilang katawhan kabahin sa mga guidelines sa pakigbatok sa virus.
Makabatang sa katawhan nga mapreserba ug malayo sa COVID-19 ang mga medical frontliners gikan sa virus nga usa na ka pandemic tungod sa kapaspas sa pagkuyanap niini sa tibuok kalibutan.
Gidasig sa opisyal ang publiko nga magpuyo sa balay ug dili mugawas ug kanunayon ang paghugas sa kamot ug mag-alcohol aron ang sila makalikay sa virus sama sa gidangatan sa doktor sa China nga namatay human na-infect sa maong sakit.
RadyoMaN Joel Viray
