Davao City – Barangay, sa kastila ginatawag kini nga barrio.
Kini maoy pinakagamay ug unang yunit sa gobyerno alang sa pagpatuman sa mga balaod, proyekto, programa ug uban pa alang sa katawhan.
Sa pakighinabi sa DXDC RMN Davao kang Commission on Elections kun COMELEC XI spokesperson Atty. Omar Samama, iyang gisaysay ang importansya sa presensya sa barangay sa atong komunidad.
“Basically mao ni musugod from barangay then municipality, city, province, then region, smallest structure siya, makita nato nga kung gwapo ang dagan sa brgy, hierarchy sa hierarchy, pasaka siya. Mao man gud ni ang 1st nga tao or agency of government nga pwede mu-address sa needs sa atong mga kababayan ug mga constituents” segun ni Atty. Samama.
Base sa talaan sa COMELEC, ang pilipinas adunay 42,036 ka mga brgy. diin ang Davao City adunay kapin kun kulang 180 samtang ang mga botante karon nga eleksyon dinhi sa syudad alang sa brgy. adunay kapin kun kulang 900,000 ug ginabana-banaang anaa sa 300,000 ang mga botante alang sa SK.
“The entire Davao City adunay more or less 182 barangays, ang 1st district adunay 54, 46 sa 2nd district, samtang sa 3rd district adunay 82 ka barangay,” dugang ingon sa tigpamaba.
Gilangkuban kini sa usa ka brgy. chairman ug pito ka mga brgy. kagawad ug karong tuiga, aduna nay mulingkod nga mga opisyales sa Sanggunaing Kabataan diin kahinumduman niadtong ulahing Brgy. Election tuig 2013, giwagtang una ang SK.
“Wala siyay SK that time. Gi- scrap, gi pending ang amendments sa SK nato that time” segun ni Atty. Samama.
Bag-ong lingkod man, mapulihan o magpabilin sa posisyon ang mga kandidato nga midagan sa 2018 election, hinaut sa katawhan nga dili lang sila sa posisyon taman apan ilang hatagan og pagtagad ang ilang mga responsibilidad isip mga tagdumala sa ilang nagkadaiyang brgy. alang sa kaayuhan sa ilang mga ginsakpan.
Serbisyong tinud-anay alang sa katawhan ang angay.
RadyoMaN Renz Barbarona
