Davao City – Wala man nakadawat sa Senior Citizens Social Pension Program sa Department of Social Welfare and Development 11 ang mga senior citizens sa Barangay Tibungco, apan padayon gihapon sila sa pagsalmot sa mga kalihukan.
Usa si nanay Virginia Cebial ug sakop sa Caimito Senior Citizens Organization Tibungco Chapter nga wala pa makadawat og pension program sa DSWD 11 tungod sa pension sa SSS, apan bisan paman niini wala siya moundang sa mga kalihukan sa ilang grupo.
Gihatagan og prayoridad sa Barangay 37-D ang pagtabang sa mga senior citizens pinaagi sa pag-mugna og mga programa nga makaayo kanila.
Dili buot ni Kapitan Rebecca Diong nga makita niya ang mga senior citizens sa ilang barangay nga walay pulos ang kinabuhi ug igo na lang mag-istambay sa gym.
Busa wala gyod kalimti sa Barangay Council ang paglakip sa mga tigulang sa mga programa nga gitagana sa ubang sektor sa Barangay 37-D, sigun ni Kapitan Diong.
Sa matag tuig nga Internal Revenue Allotment sa Barangay 37-D, naandan na ang pagkaltas og 5% ani aron masustentuhan ang mga programa alang sa mga senior citizens.
Suportado usab sa barangay ang pagpartisipar sa mga Senior Citizens sa mga kalihukan sa Office of the Senior Citizens sa siyudad sa dabaw matag tuig.
Giingon ni Kapitan Diong nga kabahin sa iyang serbisyo ang mga tigulang busa gipaluyuhan niini ang bisan unsa nga mga programa nga puwede makapalambo sa kinabuhi sa mga senior citizens.
Gibarugan sa kapitana nga aduna pa’y mahimo ang mga tigulang kun mahatagan lang sila og panahon nga makatrabaho og balik sa gobyerno o sa pribado man.
Gibatbat pa niini nga uyon kini sa Anti-Age Discrimination Law kun Republic Act 10911 kay mao lamang kini panglaban nila aron sila madawat pa sa trabaho bisan og retirado na sila.
RadyoMaN Joel Viray
