Davao City – Gikumpirma ni ABC President Councilor Edgar Ibuyan Sr nga nagpatawag og panagpulong si Mayor Inday Sara Duterte-Carpio sa tanang mga konsehal pinaagi sa viber.
Sigun ni Councilor Ibuyan Sr, gi-assign sa mayor ang mga konsehal nga magmonitor sa mga barangay aron masayran kung kinsa kadtong naglisod ug wala na’y makaon tungod sa epekto sa lockdown.
Ang lockdown gipatuman sa tibuok rehiyon onse kini aron mapunggan ang pagsulod sa mga tawo nga infected sa COVID 2019 sa ingon dili mukanat ang maong virus sa bisan asang lugar sa Davao Region.
Suma sa ABS President nga dako’g tabang ang mga diskarte nga himoon sa mga tawo aron makalahutay sa lockdown nga gipatuman sa rehiyon onse gumikan sa krisis sa COVID-19 sa nasud karon.
Miapelar usab ang opisyal sa mga nagpa-utang nga kung mahimo dili lang una maningil hilabi na sa mga trabahante ug mga drivers sa mga depasayroan nga naapektohan sa delubyo nga gimugna ni COVID-19.
Mihangyo usab kini sa mga dabawenyo nga kun mahimo maminaw ug dili musupak ug sa mga advisories sa Department of Health ug sa kagamhanang lokal aron makalikay sa nasangpit nga balatian.
Gidasig sa chairman sa committee on economic enterprise and barangay affairs sa konsenho ang katawhan nga mag-ampo sa Dios imbes nga magpadala sa kabalaka ug kahadlok tungod sa maong virus.
Alang ni Councilor Ibuyan Sr, ang pagduol ug pagsambit sa Ginoo uban sa panaghiusa ang makapahupay ug makapalinaw sa gibati sa tanang mga dabawenyo ning panahon sa mga pagsuway karon.
RadyoMaN Joel Viray
