Barangay Kagawad, dakop sa drug buy bust operation

133

Mambusao, Capiz – Dakop ang isa ka barangay kagawad sa banwa sang Mambusao, Capiz sa ginpatigayon nga drug buy bust operation. Naglab-ot sa anum ka sachet sang suspected shabu ang narekober sang operating team sang Mambusao PNP kag Provincial Drug Enforcement Unit(PDEU) -Team Charlie sa subject person nga ginkilala kay Juan Jalandoni, 51-anyos sang Brgy. Atiplo, Mambusao, Capiz.
Si Jalandoni ang isa man sa mga nag-surrender sa oplan tokhang sang mga kapulisan, bilang drug user. Apang lipod sa iya ihibalo ara man ini sa listahan sang mga high value target sang PNP. Magluwas sa iligal nga droga, narekober man sa amo nga persona ang 500 pesos nga buy bust money. Nahibaluan nga antes ginkasa ang operasyon, maid-id nga validation kag monitoring ang ginpatigayon sang mga otoridad kag nakumpirmar nga ini ang liwat nagbalik sa iligal nga buluhaton.
Ang nasambit nga persona ang nagaduso sang iligal nga droga sa mga kaiping nga barangay sa nasambit nga banwa. Sa madumduman, ang banwa sang Mambusao amo ang pinakauna nga banwa sa Capiz nga nag-deklarar nga “DRUG FREE”.

Facebook Comments

From Advertisers