TACLOBAN CITY – Ginpusil-patay an usa nga barangay kagawad ha P-1, Brgy. Dagum, Calbayog City, Samar kakukop, September 12.
Subay ha report han Police Regional Office 8, ginkilala an biktima nga hi Simeon Tarrayo, 51 anyos, Brgy. Kagawad han Brgy. Carmen han mao nga syudad.
Nagawas ha inisyal nga imbistigasyon han mga otoridad, sakay an biktima han iya single nga motorsiklo han tambangan hiya han upat (4) nga suspek sakay gihapon han duha nga motorsiklo.
Ginpusil han mga suspek hi Simeon.
Mayada gihapon armas an biktima ngan umato ini kun diin patay an usa nga suspek.
May mga igo hin bala han pusil hi Simeon, gindara ini ha hospital pero dead on arrival na ini.
An usa naman nga suspek, naka angkon hin duha nga igo hin pusil ha iya dughan nga nagresulta han iya kamatay.
Ha pagka yana, nagpapadayon an imbistigasyon han mga otoridad kun ano an hinungdan han krimen ngan para magkadadakop an iba pa nga mga suspek.
