MINOYAN, MURCIA. Patay ang barangay kagawad sang Brgy. Minoyan, patay man ang driver sang riding-in-tandem, apat ka mga tanod pilason sang nagpatigayon sang checkpoint ang barangay mga las 11 kagab-i, Marso 26 sa Purok Uno.
Nakilala ang kagawad kay Rex Dalmacio, 52 anyos kag retired army sa diin patal nga pilas sa idalom sang iya dulunggan ang gintunaan sang iya gilayon nga kamatayon.
Patay man ang driver sang motor nga ila ginparahan nga nakilala sini lang nga si Jonel Cardinal, tag-iya sang motor kag pumoloyo sang Sitio Antawan, Barangay Kanlandog, Murcia.
Si Jonel, may bata, OFW ang asawa kag ang trabaho sini amu ang pagpangsarahi sang kahoy.
Pilason ang mga tanod nga sanday Samuel Siocon, may igo sa tyan; Rommel Odane, igo sa hita; Kent Canoy; igo sa tiil kag Alex Elosorio, igo sa paa.
Nakapalagyo naman ang gunman nga upod sang napatay nga driver nga suno sa report pilason man.
Sa imbestigasyon sang DYHB, ginparahan paagi sa checkpoint ini sila bangod sa curfew. Mga 20 minutos ang pag-istoryahanay nanday Kagawad Dalmacio kag sang mga tanod bangod wala sang mapakita nga lisensya ang duha kag wala man rehistro ang motor.
Nagdesisyon ang barangay nga dal-on ang duha sa Police Station kag ibilin naman ang motor.
Hubog naman ang duha.
Apang sang manugsaka na sa salakyan sang barangay, nagpangtiro ang upod ni Jonel (wala nakilala) sa mga tanod. Nagbalos man si Kagawad Dalmacio kag natiruhan ang driver sang motor. Gintiro sang suspek si Kagawad nga gintunaan sang iya pagkamatay.
Si Kagawad Dalmacio amu ang Officer of the Day sa amu nga tion nga incharge sa checkpoint upod ang mga tanod.
