Napiling grand winner na usab sa Best in Lupon Tagapamayapa Incentive Awards 2018 ang Barangay Kauswagan.
Tungod niini, gidawat ni Kapitan Pedro Balite ug mga sakop sa lupon sa Barangay Kauswagan ang 110-mil pesos ug plake nga gitunol ni City DILG Director Engr. Jane Docallos, kauban sila Kagawad Annie Daba, SK Federation President John Michael ug Acting City Administrator Teddy Sabuga-a Jr. atol sa flagraising sa City Hall kagahapon sa buntag.
Nahimong first runner up ang Barangay Canitoan nga nakadawat og 90-mil pesos ug second runner up ang Barangay Camaman-an nga nakadawat og 70-mil pesos.
Nasayran nga gihatagan gihapon og dies mil pesos matag usa isip consolation prize ang 13 ka mga barangay nga nakasulod sa Top 15.
Lakip niini ang Barangay Nazareth, Gusa, Agusan, Bayanga, Patag, Baikingon, Tignapoloan, Bonbon, Bugo, Lapasan, Barangay 26 ug FS Catanico.
Tumong sa “Best in Lupon Tagapamayapa Incentive Awards” ang paghatag og pasidungog sa mga Lupon Tagapamayapa nga nakapasar sa standards sa DILG diha sa paspas nga pag-atiman ug pagsulbad sa mga kaso nga gisang-at sa ilang tagsa-tagsa ka barangay.
