Davao City – Luyo sa padayong krisis hatud sa Coronavirus Disease 2019 (COVID-19), padayon usab ang ayuda nga gitanyag sa City Government of Davao sa nanginahanglan ug kwalipikadong Davaoeños.
Sa interbyu sa DXDC RMN Davao kang Presidential Commission for Urban Poor (PUCP) Commissioner Norman Baloro, gibutyag niini nga adunay bag-ong programa ang lokal nga gobyerno nga #BKBK kun Barangay Ko, Bahay Ko Program, diin kini abri sa mga indibidwal labi na kadtong wala naapil sa ubang programa sa gobyerno sama sa Social Amelioration Program (SAP), COVID-19 Adjustment Measures Program (CAMP) sa Department of Labor and Employment (DOLE), Small Business Wage Subsidy (SBWS) ilawom sa Social Security System (SSS) ug uban pa.
“I think this is the right time for them to apply for this program kay ginapangita gyud ni Mayor Inday Sara ani atong #BKBK na maka trabaho sila for 15 days sa upat ka oras sa isa ka adlaw na makadawat sila’g six thousand pesos (P6,000),” gibutyag ni Baloro.
Dugang sa opisyal nga sugdan sa Enero 25, 2021 (Lunes) ang pagpanghatag sa application forms sa #BKBK Program diin adunay gitaganang 6,271 slots alang niini nga maggikan sa anaa sa P40 million nga budget sa maong programa.
Nasayran nga gawas sa maong bag-ong programa, nagpadayon usab karon ang Work for Davao, Eskwela Davao ug TUPAD (Tulong Panghanapbuhay sa Ating Disadvantaged/Displaced Workers) Program alang sa kwalipikadong mga benepisyaryo.
RadyoMaN Kirby Manzon, RadyoMaN Abi Bibera
