Davao City – Gipasigarbo karon ni Barangay Centro Agdao Captain Rene Estorpe ang nindot nga dagan sa iyang lugar gumikan sa mga programa nga direktang nakatabang ug nakabenepisyo sa katawhan.
Gisulti ni Kapitan Estorpe nga iyang gihatagan og prayoridad ang peace and order, panglawas,livelihood, clean-up drive, proyekto, kaayohan sa mga kabataan, ug daghan pang uban.
Dugang ni Estorpe, ang naasoy nga mga programa maoy tubag sa mulo ug reklamo sa iyang katawhan sama sa peace and order diin sukad gipakusgan ang kampanya kontra tambay malinawon na ang ilang dapit tibuok gabii.
Matud ni Estorpe, wala usab niya lung-i ang kampanya kontra droga diin ang tanang mga nalambigit sa ilegal nga droga gipanglutos ug napaslak na sa prisohan aning panahona.
Gihatagan usab og pagtagad ni Estorpe ang programa sa panglawas pinaagi sa paggahin og pundo sarang adunay mabunlot ang opisyal alang sa mga nanginahanglan niyang katawhan.
Sa tumong matabangan sa paghaw-as ang iyang katawhan gikan sa kalisud, nagmugna og livelihood projects ang ilang Barangay Council aron maayudahan ang mga ginikanan nga walay trabaho.
Lakip usab sa gipakusgan mao ang mga proyekto nga may kalabotan sa imprastraktura sama sa dalan, drainage system ug uban pa nga ni-alibyo sa suliran sa baha panahon magbunok ang ulan sa siyudad.
Gipasabot sa kapitan nga nagmalampuson ang implimentasyon sa ilang mga programa gumikan sa partisipasyon ug pagsuporta sa iyang katawhan luyo sa lahi-lahi nga baruganan sa pulitika sa barangay.
RadyoMaN Joel Viray
