Barangay tamugan, wa pa tubaga sa apo agua

Davao City – Niadtong adlaw’ng Biyernes sa miagi nga semana, nagpadala og suwat ang Barangay Tamugan Council sa Apo Agua Management sa tumong nga ma-istoryahan ang isyu ug mulo sa mga residente, kabahin sa pagkahubas sa tubig sa Panigan-Tamugan River sa miaging mga adlaw.

Matud ni Barangay Tamugan Kagawad Juanito Ayog, wala pa sila makadawat og tubag gikan sa Apo Agua sa suwat nga ilang gipadala ug kagahapong adlawa unta, ang ilang gilauman nga moatubang sa Barangay ang mga Representante o mga opisyales sa kompanya.

Sigun ni Kagawad Ayog, karong adlawa ilang adtuon ang kompanya aron ilang makuha ug madungog ang bahin sa Apo Agua, aron dili mahimong bias ang Barangay kabahin sa mulo ug reklamo sa mga tawo nga gipahid sa naasoy nga kompanya.

Matud sa Kagawad, human giadtoan ang lugar ug gisusi sa DXDC RMN Davao news team, ang isyu sa nakalabay’ng semana, mikusog pagbalik ang dagayday sa tubig sa sapa, apan karon mibalik na usab og kagamay ug natahap ang opisyal nga posibleng gisuyopan na usab og tubig paingon sa reservoir sa Apo Agua ang Tamugan River.

RadyoMaN Joel Viray