Pagadian City – Kritikal ang usa ka barangay tanod human gipusil sa riding in tandem atubangan mismo sa iyang anak alas 5:45 kagahaponsa hapon sa Prk. Sili, Barangay, Kahayagan, Pagadian City
Giila ang biktimang si Joseph Ramirez Sr., 46 anyos minyo ug kasamtangang barangay tanod sa Barangay Gubang, Pagadian City ug part time security guard sa usa ka establishment.
Base sa inisyal nga imbestigasyon sakay sa single motor ang biktima angkas ang iyang 11 anyos nga anak nga babaye padulong sa sentrong bahin ning syudad apan paghidangat niini sa Prk. Sili, Barangay Kahayagan gisundan kini sa mga suspek nga sakay sa motorsiklo.
Sa walay langan gipusil sa makadaghan ang biktima hinungdan nga natumba ang ilang gisakyang motor ug nalabay ang batang babaye apan suwerte nga wala maigo sa bala.
Nakaangkong ug igo pinusilan si Ramirez sa nawong, dughan ug kamot. Daling gidala sa residente ang biktima sa hospital ug kasamtangan pa kining nagpaalim sa iyang samad pinusilan.
Personal nga panagbangi ang gilantaw nga angolo sa kapulisan sanglit aminado ang biktima nga aduna na siya’y bahad nga nadawat sa wala pa ang hitabo ang pagpamusil.
