Polanco – Balhog na karon sa selda sa Polanco Municipal Police Station, ang usa ka barangay tanod nga gikaigong namusil sa iyang silingan, nahitabo alas 9:30 sa niaging gabii didto sa Purok Saging, Barangay De Venta Perla, lungsod sa Polanco, ning lalawigan sa Zamboanga Del Norte.
Ang suspek nga nadakpan naila nga mao si Vernel Elopre Elumbaring, hingkod ang edad ug chief tanod sa Barangay De Venta Perla sakop sa susamang lungsod.
Subay sa report gikan sa Polanco Municipal Police Station, nasayran kining suspek, gisumbong sa silingan biktima nga si Richard Gumanad, 32 anyos, minyo ug usa ka mag-uuma.
Saysay sa biktima ngadto sa mga police investigator, ang suspek kalit lang nibutho sa ilang panimalay nga armado sa kalibre 38 revolver ug sa wa hisayring hinungdan kalit matud pa’ng namusil apan swerting wa kabuto ang armas de fuego.
Ang biktima uban sa iyang amahan ug asawa, maoy nagtabang layog sa supek og nailog ang gihuptang armas kinsa daling sab kining nakasibat palayo sa dapit.
Gilayong nisumbong sa buhatan sa kapolisan ang biktima ug giturn-over ang 38 revolver nga iya sa suspek nga kargado sa duha ka buhing bala.
Ang kapolisan sa Polanco naglusad og follow-up operation kagahapon sa alas 7:00 sa gabii dihang nasayran ang nahimotangan sa suspek nga toa nagtago sa iyang paryente sa dakbayan sa Ozamis diin malapuson kining nadakpan.
Personal nga bingkil sa duha ang gibutyag sa kapolisan nga hinungdan sa maong hitabo.
