San Jose, Cam. Sur-Ribo-ribong benepisyaryo na an natawan tabang kan Medical Assistance Program sa 4th District (Partido Area). Patotoo ini na an fundo na pig-alokar para sa programa napapaduman bako sana sa konstituwentes kan distrito kundi magin sa ibang pasyente sa luwas kan distrito na orog na nangangaipo. “Dakulang tabang po an programa sa mga tugang nyatong tios na mayong kapasidad magbakal bulong o magbayad sa laboratory fees”, ini an sabi ni Jerold Pena, person in-charge kan programa, na ngunyan nagdadalagan man para alkalde kan banwaan nin San Jose. An serbisyo ni Pena an pighadoy ni Arnie Fuentebella, aspirante para deputado kan Partido, para maging katuwang sa mga programa sa salud na pigkokondocer kan saindang grupo asin para lalo pang pahiwason an Medical Assistance Program. Sa ngunyan, nasa 4,264 na pasyentes na an nabenepisyaran kan programa poon pa kan 2014. Dagdag pa digdi an numero kan mga pasyenteng mayong mga cellphone. Sabi ni Fuentebella, prayoridad kan distrito na maiheras an kalidad na serbisyo sa salud sa lambang familya. Pinasalamatan nya an mga katuwang na ahensya kan gobyerno, arog kan Department of Health, National Kidney and Transplant Institute, Phil. Children’s Medical Center, PCSO. Digdi sa Camarines Sur, sa Bicol Medical Center pigre-refer an mga pasyente kun saen may help desk an DSWD na maatender sainda. Pinapasalamatan man nya an BMC medical social workers na pinamayohan ni Mrs.Rose Angeles na ngunyan nagretiro na asin sinalidahan ni Mrs Rosaline Bragais. “Dae dapat mawaran nin pag-asa an mga pamilyang tikapo sa kwarta nin huli ta may tabang asin pangataman na naghahalat sainda kung sinda magkahelang”, dagdag pa ni Fuentebella. Para sa mga nagkakaipong asistensya medikal, magtxt sana sa numero 09213163747 o 09216508354. Papadarahan kamo nin forma na dapat nindong simbagon manungod sa pasyente. # credits for text and photo:Celia San Jose
