SYUDAD sang Iloilo – Baybay ang ginagamit nga kasilyas sang mga illegal settlers sa coastal barangay sa syudad sang Iloilo suno sa City Environment and Natural Resources Office ukon CENRO.
Ginpahayag ni Engr. Hernan Escoto sang CENRO wala sang comfort room ang halos tanan nga naga-squat sa mga coastal barangay rason nga kon maglabay ka sa lugar may makit-an nga nagalutaw nga higko sang tawo kag kon indi gani nagabalingaso ang baho.
Dugang pa sini nga kalabanan sa mga illegal settlers ang naghalin sa iban nga lugar kasubong sang probinsiya sang Romblon kag Masbate.
Bangud sini nagapangita sang paagi ang syudad nga magbutang sang mga proyekto kag mga aktibidad para nga masulosyunan ang problema sa paglapta sang higko sa palibot.
Nagapadayun man subong suno kay Engr. Escoto ang coastal resources rehabilitation program sang city government para ma-sulosyunan ang problema sang kahigko sa nasambit nga mga lugar.
Nahibaluan, may 7 ka mga ‘damak’ nga barangay sa syudad nga ginreklamo sang isa ka ‘anonymous requester’ sa Office of the Ombudsman.
Ang mga natumod nga barangay ginabug-usan sang Barangay Rizal Pala-Pala Zone 1; -Brgy. Rizal Ibarra; Brgy. Rima Rizal; Brgy. Rizal Pala-Pala Zone 2; Brgy. Rizal Estanzuela; Brgy. Bonifacio; kag Brgy. Tanza Bay-Bay.
Sang Sabado, Marso 30 nag-upod ang mga barangay sa bigtime clean-up sa syudad.
