Davao City – Susihon ang tanang ‘vulnerable structures,’ seguraduhon ang structural integrity niini ug makighiusa aron masalbar kita sa ciertong katalagman.
Unod kini sa mensahe ni Davao Acting Mayor Sebastian ‘Baste’ Duterte atol sa usaka presser pipila ka oras gitay-og ang Matan-ao, Davao del Sur sa Magnitude 6.9 temblor.
Nanawagan usab ang bise-alkalde ngadto sa tanang mga Davaoweños nga padayong magpakabana ngadto sa isig-kaingon aron maluwas kita sa dautang epekto sa peligrong hatud sa makusog nga linog nga dili matagna.
Matud sa Acting Mayor, gikinahanglang kalmado lamang ang tanan aron sa ingon walay mabiktima sa stampede.
Ang Region XI gipalibutan og faultlines sama sa Davao Central Fault System diin ang dakbayan mismo nagbaton og lima ka fault zones busa, matag karon ug unya mabati gayod nato ang mga paglihok sa yuta.
Gipasabot sa batan-ong Duterte nga ang yuta sa Davao City pirte kahumok mao kiniy rason nganong kusog ang pag-uyog sa yuta sa syudad bisan pa man og layo ang epicenter sa tremor.
RadyoMan Joel Viray
