Bata nanghilabot og kwarta, nanghatag og cash ug bugas sa barkada

Davao City – Nagbaton na og kasabutan ang duha ka kampo nga bayaran sa pamilya ang kwarta nga nagamit sa bata nga nanguha og dula-n P60,000 sa usa ka pamilya sa Governor Generoso, Davao Oriental.

Sa interview sa DXDC RMN Davao kang Police Corporal Franklin Wabe, desk officer sa Governor Generoso Municipal Police Station, iyang gisaysay nga niadtong December 31, 2023 sa dihang nabantayan sa magti-ayon nga nawala na ang kwarta sa ilang kwarto kantidad P59,000.

Ug didto nahimong suspek sa magtiayon ang barkada ug suod nga higala sa ilang anak nga 14 anyos nga lalaki nga si alyas Dodong. Didto nasayrang nipalit og bugas ang bata ug gipanghatagan ang iyang barkada pakapin ang P1,000 cash.

“Gihatag-hatag niya kay bisan kadtong anak sa tag-iya gihatagan niya og 5 kilos rice ug P1,000. Nipalit sya og bugas kay ipanghatag sa iyang barkada ug iyaha pong gihatagan og kwarta,” saysay sa pulis.

Sa dihang nasakpan ang menor de edad, narekober gikan kaniya ang cash nga P45,200 nga nabalik na sa tag-iya. Samtang, nagkasabot na sa barangay nga bayaran sa ginikanan sa bata ang balance nga P13,800.

Human sa insidente gipailawom sa Women and Children Protection Desk (WCPD) ang bata ug miangkon kini sa iyang sayop nga gibuhat. Sa pagkakaron, anaa na sa kustodiya sa ginikanan ang menor de edad.

RadyoMaN Kirby Manzon