NEGROS OCCIDENTAL – Ginsumbag, ginlampusan sang matig-a nga bagay kag gin-kuga pa matapos nga ginpatay na kag ginlugos ang isa ka 10-anyos nga bata nga babayi sa Purok Silhigan, Brgy. San Miguel banwa sang Murcia kahapon sang hapon.
Ginpahayag sang tiyo sang biktima nga ini ang resulta sang autopsy nga ginpatigayon sang Murcia Municipal Police Station sa bangkay sang 10-anyos nga biktima nga isa ka grade 5 student.
Suno sa tiyo sang biktima nga halos nabali gid ang tul-an sa bahin sang dughan sang biktima kag ang iya baga ang lubos man nga naapektuhan bangud posible ginpulpog ang iya likod agud hungod patyon para indi makapanugid.
Nahibaluan nga may mga las 4:20 kahapon sang hapon, ginsugo sang iya magulang nga si Cristina ang biktima nga magkadto sa balay sang iya ugangan agud kuhaon ang ila ginpa-freeze nga frozen food.
Apang natingala siya suno kay Cristina nga gab-I na wala pa nakabalik ang biktima gani nagpangayo na ini sang bulig sa barangay kag sa ila mga kaingud.
Pasado las 9 na sang gab-I sang nasapwan ang bangkay sang biktima sa sulod sang kampo sang tubo kon diin ang iya sini underwear ang nakita pila ka metro ang kalayuon sa iya lawas.
Angut sini, ginpahayag sang hepe sang Murcia MPS P/Major Robert Dejucos nga ila na karon ginapadalman ang imbestigasyon agud matumod kon bala ang biktima didto gid man ginpatay sa lugar nga nasapwan sa iya ukon ginbutang gid lamang ini didto.
Ini bangud nga sang mga inoras nga posible natabo ang krimen naga-ulan sa area apang sang nasapwan ang bangkay sang biktima, wala ini sang lunang sa iya lawas.
