BATAD, Iloilo – Nakahimo sang history ang banwa sang Batad matapos malab-ot ang masobra isa ka gatos nga successful blood donors sa ginhiwat nga blood donation drive sang DYRI RMN Iloilo upod ang Municipality of Batad , Iloilo Society Commercial, Philippine Red Cross kag iban pa.
Sa kabug usan, nakatipon ang Batad sang 154 successful blood donors sa diin masobra ini sa ila target nga 100 blood donors.
Suno kay Dr. Maria Rhesyl dela Rosa, Municipal Health Officer sang Batad, sang nagligad nga Abril may ginhiwat man sila nga blood letting activity apang masobra 60 lamang ang nakuhaan sang dugo.
Overwhelming para kay Dr. Dela Rosa ang ginpakita nga suporta sang mga pumuluyo sa ila panawagan.
Ini ang labing una nga higayon sa idalum sang iya pagpamuno nga nakasobra sa 100 ang nagdonar sang dugo sa banwa.
Ginpasalamatan man Dr. Dela Rosa ang mga Punong barangay sa 24 ka barangay sa Batad kag tanan nga nga pumuluyo sa aktibo nga suporta sa ginhiwat nga blood donation activity.
Ang madinalag on nga blood donation activity sa Batad kabahin man sang 67th anniversary sang RMN Networks.
