Sa pakighinabi sa DXDC RMN Davao kang Police Staff Sargeant Angelito Arce, imbestigador sa Monkayo Municipal Police Station, iyang giila ang biktima nga si Jaymar Ablec, 24 anyos. Samtang ang driver sa truck mao si Desiderio Lepetin.
Gisaysay sa pulis nga ayha ang insidente, nakamatikod na ang igsoon sa biktima nga adunay problema ang iyang manghud ug sige kini’g paandar ug padagan sa iyang motor hangtud nga misimang kini sa pikas lane ug gisungag ang kasugat nga truck ug napasok atubangan sa sakyanan.
“Base sa imbestigasyon namo ug according pud sa statement sa magulang o igsoon sa namatay, naa daw toy problema iyang manghud. Bahin daw sa uyab, gibulagan daw. Lain daw iyang manghud kay putongon. Mura na daw to’g nanamalit iyang manghud. Unya sige’g rangrang sa motor. Sige’g padagan og kusog unya muhunong napud. Gibadlong nila, dili magpatoo,” segun sa imbestigador.
Matud sa pulis, walay helmet ug lisensya ang biktima samtang dili usab rehistrado ang iyang motor.
Nasayrang nagbaton ra usab og amicable settlement sa barangay ang duha ka kampo, ug mipasalig ang driver sa truck nga tabangan ang pamilya ug ang pagpahilona sa biktima.
RadyoMaN Kirby Manzon
