Sa pakighinabi sa DXDC RMN Davao kang Police Major Meliton Sango I., ang chief of Police sa Manay Municipal Police Station (MPS), giila ang biktima nga usa ka Freddie, 21 anyos ug ang pulis nga mao si Patrolman Jesser Duay nga naka-destino sa Lupon Police Station.
Sa pagpanubay, nahitabo ang insidente niadto pang Disyembre 2023 ug giingong naareglo na kini kay dili na gusto sa pamilya nga magdako pa ilabi na nga managsilingan ra sila apan paggawas sa video niini lamang Enero 10, 2024, nangusog matud pa ang igsuon sa biktima nga iduso ang reklamo.
Migawas sa imbestigasyon nga nasuko ang pulis tungod giingong wala mituman ang batan-on sa sugo niining ipahipos ang kanding dala tubag nga, “nganong mutoo man ko sa imoha? Abi kay police ka ing-ana na ka manugo, wala man koy utang sa imoha.”
Hagit karon ni Sango sa pamilya ni Freddie nga ipresenta ang tanang dokumento aron maduso ang kaso ug mahatagan og hustisya ang gidangatan sa biktima.
Samtang aron usab patas ang imbestigasyon, sutaon pa sa otoridad ang blurred nga video nga maoy mikatag online.
“Of course, we should not put the law in our hands. Although naa tay authority but still kung naay may differences between our neighbors, naa man tay agencies like the barangay kung naa man tay mga problema. Hoping that this will not generalize the entire core of the PNP personnel. Kami sa kapulisan sa Manay, sa personnel sa Manay Police Station wala mi naga-tolerate ana ilabi na ako nga chief of police,” panawagan pa ni Sango.
RadyoMaN Ivy Parido
