Dipolog City, ZN – Nadakpan sa gihimong follow-up operation sa kapolisan sa dipolog ang usa ka bartan-on lalaki dihang natombok nga maoy responsable sa pagpangawat sa unom ka hiniktan manok igtalari sa miaging gabii didto sa may purok buli barangay minaog, dakbayan sa dipolog.
Sa nahipos nga kasayuran gikan sa dipolog pnp, naila ang nadakpan nga si Robert Batalan Bastida 21 anyos, ulitawo, nga taga purok pag-asa barangay barra, dakbayan sa dipolog.
Samtang padayon pa karon ang hot puirsuit operation sa kapolisan sa kauban niini nga si Danilo Bastian hingkod ang edad, nga taga barangay Bethlehem, lungsod sa polanco, ZN.
Nasayran ang mga natombok na suspek maoy responsable sa pagpangawat sa unom ka manok hiniktan nga iya ni Vincent Adlaon, sulod sa koral sa panimalay niini sa may purok buli.
Matud pa mga alas 11:45 sa niaging gabii, gibitbit na unta sa duha ang usa ka talisay, usa ka bangkas ug upat ka kolor pula nga manok hiniktan apan way swerting nakit-an kini sa silingan sa tag-iya nga si Joseph Bari ug gisingitan, hinongdan nakadalagan og gibiya-an ang manok lakip na ang single motor nga ilang gisakyan.
Sa gihimong pagutingkay sa mga polis sa sulod u-box sa single motor, nasuta ang tag-iya niini mao si Virginia Bastida nga taga barangay barra inahan sa suspek.
Didto na nadakpan sa follow-up operation sa kapolisan, kagahapon pasado alas 5:00 sa hapon ang suspek nga Robert, ug iya gitug-an ang kauban sa pagpangawat nga si Danilo Bastian kinsa at large pa karon sa kamot sa otoridad.
