Batan-on nga napalgan sa Maco, posibleng sa laing lugar gipatay

Davao City – Hustisya ang singgit karon sa kabanay ug kaila sa lalaki nga napalgang wala nay kinabuhi sa Barangay Anibongan, Maco, Davao de Oro alas 3:00 sa kaadlawon, Marso 20, 2024.

Gani, gipalawman karon sa Maco Municipal Police Station (MPS) ang imbestigasyon sa kamatayon sa biktimang si John Lauron, 19 anyos nga taga, Tagum City, Davao del Norte.

Sa interview sa DXDC RMN Davao kang PCpt. Jose Archer Branzuela, Deputy Chief of Police sa Maco MPS, iyahang gisaysay nga posibleng gipatay sa laing lugar ug gilabay lang sa maong area ang biktima nga nagbaton og mga samad pinusilan.

“Sa crime scene, wala man gud nagbanaw. Kay kung didto na gipusil, magbanaw gyud ang dugo didto sa crime scene. Wala man gud. Naa lang syay tama lang sa samad nga nitulo lang gamay sa iyang lawas,” saysay ni Branzuela.

Nasayrang adunay live-in partner ang biktima ug adunay anak, rason nga mas nagsubo ang iyahang nabiyaang pamilya.

RadyoMaN Kirby Manzon