Davao City – Nasikop sa kapulisan sa Marilog PNP ang usa ka lalaki human nangarnap og usa ka motorsiklo alas 6:00 ang takna sa buntag natigayon didto sa Sitio Maligaya Brgy. Marilog siyudad sa Davao.
Subay sa blotter sa Marilog PNP, nagpatala sa presinto sa kapulisan ang tag-iya sa single motorsiklo nga si Egie Cordero, 40 anyos, usa ka caretaker sa rest house ug residente sa nasampit nga lugar.
Sa imbestigasyon sa Marilog PNP nga gilusad sa pagpanguna ni Senior Police Officer 1 Manubag ug Police Officer 1 Caseres, nasayran nga samtang gi-parking sa tag-iya ang iyang motorsiklo atubangan sa maong rest house iya nalang nadiskobrehan nga nahanaw na kini niadtong tungora.
Hinungdan daling nagpakitabang sa Marilog PNP ang tag-iya gumikan kay iyang nakit-an nga dunay laing tawo nga nagmaneho sa iyang motorsiklo padulong sa dakbayan sa Davao.
Daling girespondehan kini sa kapulisan sa Marilog resulta sa pagkasikop sa suspect nga naila sa pangalang John Mark Alinsonorin, 19 anyos, nagpuyo sa Sitio Epol Brgy. Baganihan, Marilog District.
Gihikay na sa kapulisan sa Marilog PNP ang kasong motornap batok sa suspetsado aron ipasaka sa korte.
RadyoMaN Don Pulayao
