Batan-ong lalaki nakaplagang patay likod mismo sa ilang panimalay

Davao City – Wala na’y kinabuhi nga nakaplagan ang 14-anyos nga si Emmanuel Miguel Plasabas likod mismo sa ilang panimalay sa Purok 8 San Vicente, Panabo City pasado alas 6 sa buntag, September 14, 2023.

Sa interview sa DXDC RMN Davao kang Chief of Police sa Panabo PNP, Police Major Jun Bautista, iyang gibutyag nga sumala sa ilang inisyal nga imbestigasyon base sa saysay sa amahan sa biktima, nasayrang alas onse sa gabii, September 13 nananghid pa ang iyang anak nga manakop og baki apan wala na kini nakabalik pa og nakita nalang ang patay’ng lawas niini pagkabuntag.

Matud pa nga gituohan sa pamilya nga aksidenteng na slide si Plasabas sa may lapok nga lunangan kung asa siya nakit-an ug tungod sa weather condition ug water level niini giingong nakuyapan ang biktima ug didto na nakabsan sa iyang kinabuhi.

“What is sure doon is no foul play and even no sign of struggle doon. Even the family believes talaga na it’s a mere accident,” segun ni Bautista.

Giklaro usab ni Bautista nga wala’y makapamatuod nga nakuryentehan ang biktima tungod kay wala’y nakitang sign of electrification sa iyang lawas.

Sa pagkakaron, blangko pa ang pamilya ug kabanay ni Plasabas sa saktong hinungdan sa iyang kalit nga kamatayon.

RadyoMan Ivy Parido