South Cotabato – samdan ang 18 anyos nga batan-on human gipusil sa usa ka opisyal sa barangay human niining gibalikas ang suspek nga igo rang nagbaktas sa may Purok Sampaguita, Barangay Derilon, Banga, South Cotabato niadtong nakalabayng gabie.
Giila ang biktima nga si Jun Angos Mer, 18, ulitawo, laborer , residenti sa samang lugar.
Samtang ang suspek nailang si Jefferson Alejania Dela Cruz, 39, minyo ug residenti gihapon sa samang barangay.
Sa inisyal nga imbistigasyon sa Banga Municipal Police Station nasuta nga nag-inum ang biktima uban sa tulo niya ka mga amigo.
Miagi sa lugar si Dela Cruz, kalit kining gisinggitan sa biktima dayon gilabayan ug hait nga mga pulong nga gikasuko sa nahisgutang opisyal sa Barangay.
Kalit mibutlot ug pusil si Dela Cruz dayon gipusil ang biktima gamit ang kalibre 38 nga pistol niini igo ang biktima sa walang bahin sa iyang abaga.
Gidala dayon sa iyang mga amigo ang biktima sa ospital, samtang si Dela Cruz, gilayon man nga mitahan sa Banga Municipal Police Station ug kasamtangan na karon nga balhog sa silda.
Anaa na usab sa kustudiya sa kapulisan ang pusil sa maong opisyal human buluntaryo niining gi-turn over sa otoridad. Sa karon ginahan-ay na sa kapulisan ang pagpasang-at ug kaso batok sa nahisgutang barangay kagawad.
